கழுகுமலை அருகே 2 ஆட்டோக்கள் நேருக்கு நேர் மோதி விபத்து: பெண் உள்பட 10 பேர் படுகாயம் :

கழுகுமலை அருகே இரண்டு ஆட்டோக்கள் நேருக்கு நேர் மோதிக்கொண்ட விபத்தில், பயணிகள் உள்பட 10 பேர் படுகாயமடைந்தனர்.

தூத்துக்குடி மாவட்டம்,கழுகுமலை பாலசுப்பிரமணியம் தெருவைச் சேர்ந்த ராமச்சந்திரன் மகன் முரளிராஜ் (29).

இவர் ஆட்டோ ஓட்டுநராகப் பணியாற்றி வருகிறார்.

இவர் நேற்று முன்தினம் இரவு 9 மணியளவில் அதே பகுதியைச் சேர்ந்த சரஸ்வதி, முனியம்மாள் ஆகியோரைச் சவாரி ஏற்றிக்கொண்டு பழங்கோட்டையில் இருந்து கழுகுமலையை நோக்கி ஆட்டோவில் வந்து கொண்டிருந்தார்.

ஆட்டோ கழுகுமலை - கயத்தாறு சாலையில் பாண்டி முனீஸ்வரர் கோவில் அருகே வந்தபோது, எதிர்பாராதவிதமாக எதிரே வந்த மற்றொரு ஆட்டோவும், முரளிராஜின் ஆட்டோவும் நேருக்கு நேர் பலமாக மோதி விபத்துக்குள்ளானது.

இவ்விபத்தில் ஆட்டோ ஓட்டுநர் முரளிராஜ் படுகாயமடைந்தார்.

ஆட்டோவில் வந்த சரஸ்வதி, முனியம்மாள் ஆகியோர் லேசான காயங்களுடன் உயிர் தப்பினர்.

எதிரே வந்த மற்றொரு ஆட்டோவை ஓட்டி வந்த கழுகுமலை இந்திரபிரஸ்தம் தெருவைச் சேர்ந்த ஓட்டுநர் விக்னேஷ் (32), மற்றும் அதில் பயணித்த சாந்தா, மனோகரன், ராஜீவ்காந்தி உள்ளிட்ட 7 பேருக்கும் காயங்கள் ஏற்பட்டன.

இவ்வாறாக இரு ஆட்டோக்களிலும் பயணித்த மொத்தம் 10 பேர் காயமடைந்தனர்.

இச்சம்பவம் குறித்து தகவலறிந்து வந்த கழுகுமலை காவல் நிலைய ஆய்வாளர் சுகாதேவி, உதவி ஆய்வாளர் தமிழ்நெறி மற்றும் போலீசார் உடனடியாகச் சம்பவ இடத்திற்கு விரைந்து சென்று, காயமடைந்தவர்களை மீட்டு கோவில்பட்டி அரசு மருத்துவமனைக்குச் சிகிச்சைக்காக அனுப்பி வைத்தனர்.

அங்கு அவர்களுக்குத் தீவிர சிகிச்சை அளிக்கப்பட்ட நிலையில், படுகாயமடைந்த 4 பேரைத் தவிர மற்ற அனைவரும் முதலுதவி சிகிச்சைக்குப் பின் வீடு திரும்பினர்.

இச்சம்பவம் குறித்து கழுகுமலை போலீசார் வழக்குப் பதிவு செய்து விசாரணை நடத்தி வருகின்றனர்.